பழைய வழக்கு

மிகவும் இரக்கமுள்ள தாயே! உமது அடைக்கலமாக ஓடிவந்து, உம்முடைய உபகார சகாயங்களை இரந்து மன்றாடிக் கேட்ட ஒருவராகிலும், உம்மால் கைவிடப்பட்டதாக ஒருபோதும் உலகில் சொல்லக் கேள்விப்பட்டதில்லை என்பதை நினைத்தருளும். கன்னியருடைய இராக்கினியான கன்னிகையே, தயையுள்ள தாயே! இப்படிப்பட்ட நம்பிக்கையால் ஏவப்பட்டு, உமது திருப்பாதத்தை அண்டி வருகிறோம். பெருமூச்செறிந்து அழுது பாவிகளாயிருக்கிற நாங்கள், உமது தயாளத்துக்கு காத்துக்கொண்டு உமது சமூகத்திலே நிற்கின்றோம். அவதரித்த வார்த்தையின் தாயே, எங்கள் மன்றாட்டைப் புறக்கணியாமல் தயாபரியாய் கேட்டுத் தந்தருளும். ஆமென்.

இணைவு செபம்

பெர்நார்துவின் செபத்தோடு பொதுவாக பின்வரும் செபம் இணைத்து சொல்லப்படுகிறது: “தொடக்கப் பாவமின்றி உற்பவித்த புனித மரியே, பாவிகளுக்கு அடைக்கலமே, இதோ உமது பாதுகாவலை நாடி வந்தோம். எங்கள் பேரில் இரக்கம் கொண்டு, எங்களுக்காக உம் திருமகனிடம் மன்றாடும். ஆமென்.”

வரலாறு

‘பெர்நார்துவின் செபம்’ கி.பி. 14ஆம் நூற்றாண்டின் இறுதியில் பிரான்ஸ் நாட்டில் தோன்றியது என்று அறிகிறோம். 12ஆம் நூற்றாண்டில் வாழ்ந்த துறவியான கிளேர்வாக்ஸ் புனித பெர்நார்தோடு இதைத் தொடர்புபடுத்துவது தவறு. இந்த செபத்தின் நீண்ட வடிவங்கள் 15ஆம் நூற்றாண்டு ஆவணங்களில் காணப்படுகின்றன. பிரான்ஸ் நாட்டைச் சேர்ந்த கிளாவ்தே பெர்நார்து (1588-1641) என்ற குரு, தற்போதைய சுருக்கமான வடிவத்தில் இந்த செபத்தை மக்களிடையே பரப்பினார். அவரது பெயராலேயே இதற்கு பெர்நார்துவின் செபம் என்ற பெயர் தோன்றியது. அவரது காலத்தில் இருந்தே, இந்த செபம் செபமாலை பக்தியோடு இணைத்து பயன்படுத்தப்படுகிறது.